नेपाली फिल्म क्षेत्रमा विगत ३ दशकदेखि सक्रिय कलाकार प्रदिप सिंहलाई अभिनेत्री रेखा थापाको रेखा फाउन्डेशनले सहयोग गरेको छ । दोश्रो पटक आएको ठूलो भुकम्पका कारण दुबै किड्नी फेल भएपछि अहिले उनको उपचार भइरहेको छ ।
आज उनी उपचार गराइरहेको अस्पताल पुगेर रेखा थापा फाउन्डेशनका तर्फबाट महासचिव सविर श्रेष्ठले नगद ५० हजार सहयोग गरेका हुन् । रेखा थापा फाउन्डेशनका तर्फबाट यसअघि विभिन्न रंग पत्रकारहरुलाई नगद सहयोग गरिएको थियो । अभिनेत्री रेखा थापा भने अमेरिका रहेकाले सहयोग हस्तान्तरणमा उपस्थित हुन सकिनन् । सहयोग पाएपछि कलाकार सिंहले आफू अत्यन्त हर्षित भएको र अब बाँच्ने आशा पलाएको बताए ।
उनले दुबै किड्नी फेल भएकाले उपचारका लागि नगद ३० लाख लाग्ने बताए । भक्तपुरमा उपचार गराइरहेका उनले नेपालमा नभए भारत जान सक्ने बताए । दुबै किड्नी प्रत्यारोपण गर्नका लागि नगद ३० लाखसम्म लाग्ने उनले बताए । दैनिक ५ देखि ७ हजारसम्म खर्च भैरहेको उनले बताएका थिए । आफूले आह्वान नगर्दा पनि कलाकारहरुले मनदेखि सहयोग गरेको भन्दै उनले खुशी व्यक्त गरे । उनले रेखासँग फिल्म हिरोमा सँगै अभिनय गरेका थिए जुन रेखाको पहिलो फिल्म थियो ।